Arall

Roedd Ffederasiwn Clybiau Ffermwyr Ifanc Cymru (CFfI Cymru) yn falch iawn o groesawu Ei Huchelder Brenhinol Y Dduges Caeredin i Ganolfan CFfI Cymru ddydd Mawrth yn ystod Sioe Frenhinol Cymru.

Yn ystod ei hymweliad, cyfarfu Ei Huchelder Brenhinol â Chadeirydd CFfI Cymru, Angharad Thomas, ac Is-gadeirydd CFfI Cymru, Dominic Hampson-Smith, a fu’n trafod gwaith y mudiad a’r cyfleoedd y mae’n eu cynnig i bobl ifanc ledled Cymru. Buont yn trafod pwysigrwydd cefnogi’r genhedlaeth nesaf o arweinwyr gwledig a’r rôl hanfodol y mae CFfI Cymru yn ei chwarae wrth ddatblygu sgiliau, hyder a chyfeillgarwch gydol oes.

Cyfarfu’r Dduges hefyd ag aelodau a gwirfoddolwyr CFfI Cymru, gan gynnwys aelodau oedd newydd gwblhau Cystadleuaeth Goginio CFfI Cymru. Cymerodd amser i siarad â’r cystadleuwyr. Mwynhaodd Ei Huchelder Brenhinol hefyd edrych drwy ddetholiad o lyfrau lloffion y clybiau, a oedd yn arddangos hanes cyfoethog, llwyddiannau ac ysbryd cymunedol Clybiau Ffermwyr Ifanc ledled Cymru.

Gyda bron i 6,000 o aelodau ledled Cymru, mae CFfI Cymru yn un o fudiadau ieuenctid gwledig mwyaf y wlad, gan roi cyfleoedd i bobl ifanc ddatblygu sgiliau arwain, cyfrannu at eu cymunedau a dathlu bywyd a diwylliant gwledig Cymru.

Dywedodd Angharad Thomas, Cadeirydd CFfI Cymru:

“Roedd yn bleser croesawu Ei Huchelder Brenhinol i Ganolfan CFfI Cymru. Roeddem yn falch o gael rhannu gwaith CFfI Cymru a’i chyflwyno i’n haelodau, gan gynnwys y rhai a oedd wedi cymryd rhan yn y Gystadleuaeth Goginio. Roedd ei diddordeb yn ein llyfrau lloffion a’r straeon y tu ôl iddynt yn cael ei werthfawrogi’n fawr.”

Ychwanegodd Dominic Hampson-Smith, Is-gadeirydd CFfI Cymru:

“Roedd ymweliad y Dduges yn gyfle gwych i arddangos brwdfrydedd a llwyddiannau ein haelodau. Roedd yn anrhydedd ei chroesawu i CFfI Cymru yn ystod Sioe Frenhinol Cymru a dathlu’r cyfraniad y mae pobl ifanc yn ei wneud i Gymru wledig.”