Newyddion CFfI Cymru

Am y tro cyntaf erioed, cynhaliwyd Rownd Derfynol Gŵyl Adloniant Genedlaethol FfCFfI yng Nghymru yn Theatr Hafren yn y Drenewydd, ac ni allai fod wedi bod yn ddathliad mwy addas o gymuned fywiog Clybiau Ffermwyr Ifanc y wlad.

Yn cynrychioli Cymru roedd Clwb Ffermwyr Ifanc Erwood a Chlwb Ffermwyr Ifanc Dyffryn Tanat gyda dau berfformiad rhagorol yn canolbwyntio ar Iechyd Meddwl. Cipiodd CFfI Erwood, sy’n cynrychioli Brycheiniog, y safle cyntaf, a sicrhaodd CFfI Dyffryn Tanat o Sir Drefaldwyn ail le. Enillodd Dyffryn Tanat ddwy wobr ar wahân hefyd: ‘Y Foment Orau yn y Theatr’ am eu golygfa arholiad, tra dyfarnwyd ‘Perfformiad Gorau mewn Prif Ran (10–17)’ i Iwan, a chwaraeodd ran Luke. Roedd gweld dau glwb Cymreig yn ennill y ddau brif safle mewn digwyddiad cenedlaethol mor fawreddog nid yn unig yn foment o falchder i’w siroedd, ond i Gymru gyfan.

Adlewyrchodd yr awyrgylch drwy gydol y gystadleuaeth fisoedd o ymroddiad, creadigrwydd a gwaith tîm. Dangosodd y ddau glwb yn union pam mae adloniant CFfI yn parhau i fod yn blatfform mor bwerus i bobl ifanc fynegi eu hunain. Teimlwyd bod eu llwyddiant hyd yn oed yn fwy arbennig gan mae dyma oedd y tro cyntaf erioed i Gymru gynnal y digwyddiad eiconig hwn.

Nid perfformiadau’r clybiau yn unig ddaeth â llwyddiant adref i Gymru. Yn y gystadleuaeth hynod gystadleuol Aelod y Flwyddyn, profodd cystadleuwyr o Gymru eu safon unwaith eto. Daeth Sian Davies o Faesyfed yn drydydd yn y gystadleuaeth Aelod Hŷn, gan arddangos ei hymrwymiad i’r CFfI. Enillodd Elin Williams o Geredigion ail le yn y categori Aelod Iau’r Flwyddyn, gan dynnu sylw at gryfder ac addewid cenhedlaeth nesaf y mudiad.

Gan ychwanegu at y dathlu, cafwyd cydnabyddiaeth bellach ar lefel genedlaethol wrth i Sarah Lewis, cyn Llywydd CFfI Cymru, gael ei hethol yn Ddirprwy Lywydd FfCCFfI. Mae ei phenodiad yn adlewyrchu ei hymroddiad a’i hangerdd tuag at y mudiad.

Nid yn unig y gwnaeth Cymru gynnal y digwyddiad gyda balchder, ond fe ragorodd ar draws sawl maes, o berfformiadau llwyfan i anrhydeddau unigol a rolau arweinyddiaeth. Mae’n amlwg bod aelodau CFfI Cymru yn parhau i wneud eu marc, ac os yw’r digwyddiad hwn yn unrhyw arwydd, mae’r dyfodol yn edrych yn hynod ddisglair.