Arall

Mae’n bleser gan CFfI Cymru gyhoeddi mai ABP fydd prif noddwr Cystadleuaeth Biff Ifanc CFfI Cymru yn Ffair Aeaf Cymru 2026.

Mae’r gystadleuaeth yn rhoi cyfle i ffermwyr ifanc o bob cwr o Gymru i arddangos yr ymroddiad, y sgiliau magu stoc a da byw sydd eu hangen i fagu a chyflwyno gwartheg biff o ansawdd uchel. 

Ar gyfer cystadleuaeth 2026, mae CFfI Cymru hefyd yn falch o gyflwyno Dosbarth Heffer Gynhenid Pur a Bustach Cynhenid Pur newydd, gan greu cyfleoedd ychwanegol i aelodau arddangos gwartheg cynhenid o safon a dathlu cryfder bridiau cig eidion traddodiadol Prydain. 

Mae CFfI Cymru yn ddiolchgar i ABP am eu cefnogaeth i’r gystadleuaeth werthfawr hon. Mae’r nawdd yn dangos ymrwymiad parhaus ABP i bobl ifanc mewn amaethyddiaeth ac yn helpu i sicrhau bod aelodau yn gallu ennill profiad ymarferol, magu hyder a datblygu sgiliau sy’n arwain y diwydiant.

Bydd y Gystadleuaeth Biff Ifanc yn cael ei chynnal yn ystod Ffair Aeaf Frenhinol Cymru gyda’r gwartheg yn cael eu harddangos ddydd Mawrth 1 Rhagfyr 2026 am oddeutu 8am, gan ddod â chystadleuwyr, cefnogwyr a chynrychiolwyr o’r diwydiant o bob cwr o Gymru at ei gilydd i ddathlu cyflawniadau ffermwyr ifanc a dyfodol cynhyrchu cig eidion Cymru.

Dywedodd Wil Worthington, Cadeirydd Materion Gwledig CFfI Cymru:

“Rydym wrth ein bodd i groesawu ABP fel noddwr Cystadleuaeth Biff Ifanc CFfI Cymru. Bydd eu cefnogaeth yn ein helpu i barhau i ddarparu cyfleoedd gwerthfawr i bobl ifanc ddatblygu eu gwybodaeth am dda byw, arddangos eu galluoedd a meithrin cysylltiadau â’r diwydiant amaethyddol ehangach.”