Newyddion CFfI Cymru

Ffermwyr Ifanc Cymru: Edrychwch yn fanwl ar Arallgyfeirio a Meithrin Cyfleoedd Newydd mewn Garddwriaeth!

Dyma alwad i bob ffermwr ifanc brwdfrydig yng Nghymru sy’n awyddus i archwilio potensial eu defnydd tir y tu hwnt i’w mentrau ffermio presennol. Darganfyddwch y posibiliadau cyffrous y gall tyfu cynnyrch ffres eu cynnig a chael y wybodaeth i’w gwneud yn fenter lwyddiannus.

Mae’r rhaglen ‘Bwyd o’r Tir’ – Tyfu ar gyfer y Dyfodolyn cynnig cyfle i ffermwyr ifanc dros 16 oed edrych ar gynhyrchu ffrwythau a llysiau proffidiol trwy ymweliadau astudio â gwahanol ffermydd sy’n arddangos gwahanol gnydau a modelau busnes.

A yw hyn o ddiddordeb i chi? Byddwch yn barod i gael eich ysbrydoli gan dyfwyr blaenllaw o bob cwr o Gymru a siroedd y gororau! Byddwch yn cael profiad uniongyrchol ar eu ffermydd llewyrchus a thrwy sesiynau ystafell ddosbarth craff.

Mae’r rhaglen yn cynnwys ymweliadau ag amrywiaeth eang o fusnesau garddwriaeth, gan gynnwys gweithrediadau yn y cae ar raddfa fawr, mentrau ffrwythau meddal llwyddiannus, a chynhyrchwyr cnydau arbenigol ac arloesol. Hefyd, bydd arbenigwyr yn y diwydiant yn rhannu cyngor busnes ac ariannol hanfodol i helpu i feithrin eich menter arddwriaethol lwyddiannus eich hun.

Bydd ymweliadau â ffermydd Cymru yn cynnwys Troed y Rhiw Organics yn Llwyndafydd, fferm organig sydd wedi’i hardystio gan Gymdeithas y Pridd sy’n cael ei rhedeg gan y teulu ac sydd wedi ymrwymo i gynhyrchu bwyd cynaliadwy a chyfannol. Maent yn tyfu gwahanol lysiau, perlysiau, ffrwythau meddal a blodau, a werthir yn lleol er mwyn sicrhau eu bod yn ffres iawn. Mae eu gwartheg yr Ucheldir, eu moch Cymreig a’u hieir yn gwella ffrwythlondeb y fferm ac yn cyflenwi cig i’w cymuned.

‘Rwy’n edrych ymlaen at archwilio cnydau garddwriaeth posibl y gellir eu tyfu’n llwyddiannus yng Nghymru ac i weld pa gyfleoedd busnes a allai fod i ffermwyr ifanc yn y dyfodol.’ meddai Jacqui Banks, Arweinydd Agrisgôp ar gyfer Cyswllt Ffermio.

Byddwch yn trafod modelau busnes garddwriaeth, cyllid a phroffidioldeb ac yn dysgu gan arbenigwyr yn y diwydiant. Bydd y grŵp yn cyfrannu at greu cystadleuaeth garddwriaeth CFfI ar gyfer 2026 gyda’r cyfarfod cyntaf yn cael ei gynnal yn Sioe Frenhinol Cymru ar 21 Gorffennaf 2025.

Mae cymorth parhaus gan fusnesau lleol Cymru i’r sector hwn yn rhoi cyfle i dyfu! ‘Mae’n wych cael Castell Howell yn cefnogi’r grŵp hwn, maen nhw’n gwneud cymaint o waith diddorol gyda chynhyrchwyr llysiau o Gymru, gan gael llysiau o Gymru ar gyfer ysgolion er enghraifft. Bydd yn wych dod i ddeall y cyfleoedd y mae hyn yn eu rhoi i ffermwyr ifanc Cymru yn y dyfodol.’

Y cyfnod cofrestru ar gyfer y rhaglen Bwyd o’r Tir yw 5-27 Mehefin, 2025. Peidiwch â cholli’r cyfle hwn i fod yn rhan ohono! Am ragor o wybodaeth am y rhaglen, yr hyn sydd wedi’i gynnwys, y dyddiadau hollbwysig ac i lawr lwytho ffurflen gofrestru, Cliciwch yma